今日同大家計下數
你今年65歲，無仔女無供過強積金，有25萬棺材本，排唔到公屋，文盲（就算過到入息審查都唔識申請長生津），行動不便，你可以有幾多年命？
首先你有$1235 生果金，住劏房月租$4000，每日三餐$30 加埋其他開支，每個月加多 $1,000，即係每年淨收入係$-45,180，棺材$1,000 (淘寶貨)，海葬唔洗錢…
即係大概， ($250,000-$1000)/ $45,180 = 5.51 年你就會岩岩好無曬錢可以去買棺材 (希望唔會有通漲，否則更快)
其實只係想帶出香港既老人福利係幾咁不足姐
今日係政總舉行左第三屆扶貧高峰會，公布左上年度貧窮率為14.3%。即係乜？即係你收入低過$3500 就係窮人，大概一百萬人到，而非綜援長者貧窮人口佔左24.5萬人。長者人口過去一年增加近4萬人，預料隨人口老化，長者貧窮人口只會不斷上升，而長者福利津貼等議題只會越來越逼切。
全民退休保障計劃（全民退保）由我未出世講到而家都只係得個講字；政府硬推強積金又年年蝕，又完全顧及唔到而家已經退左休又無供過既老人家；現時既老人福利又唔夠全面，審查制度又嚴，錢又派得少，百物騰貴，對長者來講真係好重負擔，好大壓力。
有好多人反對設立全民退保，因為將會涉及龐大開支，嚴重到當年陳佐洱直情話全民退保會導致香港「車毀人亡」。其實而家社會上提倡既全民退保每月金額係三千元左右，每年開支係三百六十億元。三百六十億對香港黎講係幾多？第三條跑道係2000億 （航空管制問題起完都唔一定飛得），東北發展用左1200億（淨係得6％地起公房，仲要當中285億落左地產商手）仲有d乜乜港珠澳大橋中部水域人工島港深機場鐵路西九文化區郵輪碼頭加加埋埋d大白象萬幾億（係真係萬幾億）。
各位身為幸福既一群，可能從來無試過貧窮，無捱過肚餓，無見過劏房，未必感受到明白到香港貧富懸殊有幾嚴重。唔好咁離地，大家試諗下，而家到你活係貧窮線下，成世操勞到頭來三餐溫飽都成問題，你又會點？
政府起勢咁推d大白象，係咁倒儲備落海，起完野又唔實用；咁點解又一直唔肯投放更多資源俾一班有逼切需要既長者呢？大家有朝一日都會老，將心比己，有邊個唔想安享晚年？
可能我講得唔夠說服力，都係交返俾余婆婆：
https://www.youtube.com/watch?v=1PqGgygOf1w
